林穎璋 Vincent，一位近年正在冒起的長跑好手，小編還記得第一次見他時，他那一頭飄逸的長髮叫人難忘，言談之間，也很欣賞這位年青小伙的謙虛與對長跑的抱負。他把原來的長髮換成清爽的短髮，好像印證著他在長跑路上的成長。
兩年前，Vincent 毅然辭掉香港科技大學的工作，在香港教育大學健康與體育學系，攻讀體育教練與管理碩士，同時亦轉為全職訓練，全心全意投入跑步事業裡。現在他已是香港長跑的新力軍，曾代表香港參加 2023 年亞洲半馬拉松錦標賽，之後在 2024 年渣打香港馬拉松半馬取得全場第二名，更在 3 月 10 日的日本靜岡馬拉松跑出了 2:19:54，成為本地第四位 sub 220 跑手，開啟他的人生新篇章。
圖 / Elton Lam @運動筆記
刻苦的訓練換來一次又一次的突破
轉為全職不久，Vincent 便奪得第一個香港本地賽事的冠軍。在 2022 年的 10 月 ASICS 香港半馬拉松挑戰賽勝出 ( 時間：1:12:45 )，緊接其後於同年的台北馬拉松半馬創下個人最佳時間 (PB) 1:07:45。之後也在不少本地及國外的比賽取得不俗成績，更在今年度香川丸龜半程馬拉松，再刷新半馬 PB 1:06:00，成為香港半馬第二快，全馬亦有不俗的成績，「（2023 年 2 月） 獻出咗我第一次全馬，係香港渣打馬拉松跑咗 2 小時 33 分，初馬嚟講都滿意。」在長跑圈子嶄露頭角，更入選 2023 年世界大學生運動會的香港田徑隊代表，與世界強豪比賽，同年 11 月時初次披上香港隊隊衣，出戰亞洲半馬拉松錦標賽。
「我發覺自己在半馬呢個距離，發揮得好好，所以就參加今年 ( 2024 年) 香港渣打馬拉松半馬，成功以 兩個月左右訓練，以全場第二本地第一完成。」先後經歷疫情，訓練或比賽受傷，渡過不同的改變，「 2022 年開始嘅跑步歷程，其實都好多曲折 ⋯⋯」雖然遇到許多困難與挫折，但很幸運遇到很好的人同事，「有好嘅經紀人，仲有身邊好多朋友，有家人嘅支持，可以繼續行呢條全職運動員嘅路。」
圖 / Elton Lam @運動筆記
全職運動員之路
當初選擇科大工作是因為具有穩定的時間能方便訓練，不過他當時已經發覺他想在體育領域學習更多，加上他本來都希望能投身此行業，所以便辭去穩定的工作，從 2022 年年中就讀香港教育大學體育教練與管理碩士，重投學生生活，同時摸索自己的人生跑道。Vincent 亦想到，如果想與更高層次嘅對手競爭，單憑當時個人訓練水平是遠遠不夠。除了日常訓練之外亦需要營養、恢復、休息，這些不可或缺的元素。「當時經過自己的多個月嘅考慮之後就發覺，如果自己唔係呢段時間再拼好啲，攞多啲好嘅成績嘅話，遲啲老咗嘅時候，未必有呢嗰精神同體力去做一個全面的訓練，所以當時就落決定（投身全職訓練）。」
現時， Vincent 每日大約有 8 小時睡眠，平日早上或下午會做一課恢復跑，然後會正式進入正式訓練，可能會包含加速跑或是變速跑，甚至乎是節奏跑。週末時便會進行阻力訓練，間中亦會有長課，「可以模擬或適應自己喺長距離比賽嘅表現」，他回想起過去還未全職運動員的時候：「嗰時訓練量做唔到依家呢嗰安排⋯⋯兼職當然都可以做到，但變相你要犧牲好多，自律性都要比其他人做得更好。」
圖 / Elton Lam @運動筆記
運動員生涯
因早前亞洲半馬錦標賽，從而得到香港田徑總會的提名推薦他做全職奬學金運動員，現時他正申請體院資助，他指：「得到呢啲幫助固然好，但同時間都希望有唔同嘅活動調整運動員生活。」現時每個星期都會教班，亦會有贊助幫助他維持運動員的夢想，而且他在上年 11 月尾開始運行新的訓練模式，並未跟隨以往的香港本地教練，而是接受加拿大前半馬紀錄保持者 Rory Linkletter 的網上指導，「佢會按步驟班帶我去做成績，大家嘅理念都很相近 。」雖然他們從未「實質」碰面，同為專業跑手相信亦能理解彼此，Vincent 亦相信 Rory 多年的國家級及職業運動員經驗能助他在長跑路上成就更多可能。
靜岡馬拉松的 sub 220
Vincent 今年初已訂下緊密的賽程，一個月參加一場賽事：1 月渣打香港馬拉松半馬；2 月香川丸龜半程馬拉松；3 月靜岡馬拉松全馬。「今年渣打半馬十分難忘，因為始終第一次上頒獎台，同埋係香港最大型嘅跑步城市裡面拿獎，時間又唔差，對自己嚟講都係一個肯定。 」被問到賽程會否太密集，不過他表示沒問題，「我相信自己跑完呢個渣打馬拉松之後，其實係恢復得切嘅，加上定期都會睇住自己嘅身體狀況，同埋定期會做一啲測試檢查」。之後亦如他所說「回得切。」2 月 4 日在香川丸龜半馬拉松創下香港半馬第二快 1:06:04 ，在 3 月 10 日的靜岡馬拉松跑出了 2:19:54，成為本地第四位 sub 220 跑手。
為了此次全馬，他會將之前的半馬比賽作為提升基礎速度的練習，「教練就會安排我做啲比較長距離嘅訓練，加強番耐力，所以比賽之前用一個比較慢嘅速度去完成一個長距離」。在靜岡馬之前他已滿有期望，「希望自己可以 PB 之餘，都可以位列香港馬拉松較前位置，希望係 2 字頭」，而且他在日本亦有學習到新的東西帶回香港，「日本嘅訓練條氛好團結，同好有系統，我喺香港嘅訓練有啲亂」，他會將在日本學習到的東西帶回香港，他認為 2:20 這個大關將會有越來越多人破到，未來跑界人材輩出。
他的確是言出必行，在靜岡馬拉松成為第 4 位 Sub 220 的香港跑手，他指本來是想做負配速，「頭半程好順利，係預期計劃內。」然而身體去到最後已經拼盡力，「去到最後 10 公里小腿有啲抽筋，所以無加速，只求順利完成。」當時的配速 3:19 左右 ，符合他的預期。當刻他對 Sub 220 並沒有太大感覺，只想繼續推快自己的時間，問他有沒有信心成為香港馬拉松或者半馬拉松的紀錄保持者，他很明確地答道：「 有。」未來他打算跑回較短的田徑賽練速度，今年年尾會再次挑戰半馬及全馬。
結語
Vincent 在訪問中，多次提及訓練的辛酸，教練的指導，以及身邊朋友的鼓勵，他亦不忘感謝 Puma 的全力支持。去年中起，Vincent 每創佳績，半馬項目的時間在香港僅次於黃尹雋之下，全馬亦位於香港跑手的前列位置，當時全馬破 220時，腳上的戰友便是 Puma 最新的碳板比賽鞋 Fast-R 2 NITRO™，期待未來能見證 Vincent 繼續再創佳績！
（圖：vincerunner21）
Fast-R 2 NITRO™，
「延伸咗碳板，會令佢嘅推進會更加好，另外就是它在這個後踭中底那裏比較舒服，比較有彈性，當跑手跑每一步嘅時候都可以成個人彈返上去，幫自己做返個好嘅推進。」鞋底由 PBS 物料組成，跑步能更省力，更有效率。「最後 4、5K 嘅時候，其實都覺得有啲吃力，最難最辛苦，但係呢對鞋都好幫得上忙，尤其是在我的上斜位，都幫我做到嗰推進，即使係自己比較攰嘅時候，都可以幫我更有效咁將能量推向前」，從而使他的最後路段沒有那麼辛苦。
|
|
（攝自：Elton Lam）
（攝自：Elton Lam）